གཙོ་ངོས།>> ཞིབ་འཇུག>>ཀུན་འདུས།

རྩོམ་སྒྲིག་པ།ཡོང་ཁུངས།བཀྲ་ཤིས། སྤེལ་དུས། ༢༠༡༨ལོའི་ཟླ་བ་༠༣ཚེས་༠༧ཉིན།

༄༅།། ཁམས་མི་ཉག་ཡུལ་དུ་དར་བའི་བོད་ཀྱི་ཟློས་གར་ཨ་ཅེ་ལྷ་མོ།

      བོད་ཀྱི་ཟློས་གར་ནི་མཐོ་སྒང་མི་རིགས་ཀྱི་གནའ་བོའི་སྲོལ་རྒྱུན་རིག་གནས་ནང་གི་ཕུལ་བྱུང་གི་སྒྱུ་རྩལ་ཞིག་ཡིན། དེ་ལ་ཁྱད་དུ་འཕགས་པའི་འཁྲབ་གཞུང་ཡོད་ལ་འབུར་དུ་ཐོན་པའི་སྒྱུ་རྩལ་གྱི་རྣམ་པའང་མཆིས་པ་མ་ཟད། མི་རིགས་ཀྱི་ཁྱད་ཆོས་མངོན་པར་དོད་ཅིང་ཁྱད་མཚར་བའི་བློས་བསླངས་དང་ཡིད་དབང་འགུགས་པའི་གཏམ་རྒྱུད་ཀྱིས་ཕྱུར་བུར་གཏམས། བོད་ཀྱི་ཟློས་གར་ནི་བོད་རིགས་ས་ཁུལ་དུ་དར་ཁྱབ་ཆེ་ཞིང་གླུ་གར་གྱི་རྣམ་པ་ལ་བརྟེན་ནས་བརྗོད་བྱ་མཚོན་པར་བྱས་པའི་ཕྱོགས་བསྡུས་ཀྱི་རང་བཞིན་ལྡན་པའི་སྒྱུ་རྩལ་ཞིག་ཡིན། བོད་སྐད་དུ་ཨ་ཅེ་ལྷ་མོ་ཞེས་འབོད། བཤད་སྒྲོས་སུ་དུས་རབས་བཅོ་ལྔ་པར་བཀའ་བརྒྱུད་པ་ཐང་སྟོང་རྒྱལ་པོ་བརྩོན་འགྲུས་བཟང་པོས་ཟམ་པ་བསྐྲུན་པར་ཞལ་འདེབས་བསླང་བའི་ཆེད་དུ་གསར་དུ་བཏོད་པས་ཐང་སྟོང་རྒྱལ་པོ་ནི་ཨ་ཅེ་ལྷ་མོའི་ཤིང་རྟའི་སྲོལ་འབྱེད་དུ་བཀུར་བར་བྱས། དེ་ནས་བཟུང་ཟློས་གར་འཁྲབ་སྲོལ་ལྷ་སའི་ས་ཁུལ་དུ་ཁྱབ་པ་མ་ཟད། རིམ་བཞིན་དུ་སི་ཁྲོན་དང་ཡུན་ནན། མཚོ་སྔོན་བཅས་བོད་རིགས་ས་ཁུལ་དུ་དར་ཞིང་རྒྱས། དེ་དང་ཆབས་ཅིག་ས་ཁུལ་སོ་སོའི་ཡུལ་སྲོལ་གོམས་གཤིས་ཀྱི་ཁྱད་པར་གྱིས་ཁམས་པའི་ཟློས་གར་དང་ཨ་མདོའི་ཟློས་གར་རྒྱལ་རོང་གི་ཟློས་གར་བཅས་ཆར་རྗེས་ཀྱི་ཤ་མོ་བརྡོལ་བ་ལྟར་དུ་ཐོན་ཏེ་མཐོ་སྒང་དུ་ཟློས་གར་གྱི་རྐང་འཐུང་ལྗོན་ཤིང་ལ་མེ་ཏོག་སྣ་ཚོགས་སྡུག་གུར་བཀྲ། དུས་རབས་ཀྱི་འཕོ་འགྱུར་དང་བསྟུན་ནས་ཟློས་གར་ལའང་འཕེལ་རྒྱས་སོང་བས་ས་ཁུལ་གྱི་ཁྱད་ཆོས་ལྡན་པའི་ཁམས་མི་ཉག་གི་བོད་ཀྱི་ཟློས་གར་ཨ་ཅེ་ལྷ་མོ་ལ་དཔྱིད་ཀྱི་དཔལ་ཡོན་ཤར།དཔྱད་གཞིའི་ཡིག་ཆ་རུ་བཀོད་པ་ལྟར་ན། དུས་རབས་ཉི་ཤུ་པའི་དུས་འགོར་ཁམས་མི་ཉག་སྐྱིད་ལེགས་དགོན་པའི་མཆོག་སྤྲུལ་སྐུ་ཕྲེང་དང་པོ་སྐལ་བཟང་ཡོན་ཏན་ལགས་ཀྱིས་མི་ཉག་ལ་གཞས་ཀྱི་དབྱངས་རྨང་གཞི་བྱས་ཏེ་ཟློས་གར་གྱི་གཞས་གདངས་ཉི་ཤུ་ལྷག་ཙམ་གསར་དུ་བཏོད་པ་མ་ཟད་སྐུ་དངོས་ཀྱིས་འཁྲབ་གཞུང་བརྩམས་ཏེ་གར་གྱི་སྟངས་སྟབས་དང་རྔ་རྡུང་སྟངས། སྦུག་ཆལ་དཀྲོལ་ཐབས་བཅས་ཁྲིད་གནང་མཛད་པས་མི་ཉག་ཨ་ཅེ་ལྷ་མོ་ལ་ཐུན་མོང་གི་ཁྱད་ཆོས་འཛོམས་པ་མ་ཚད་མི་ཉག་ས་ཁུལ་གྱི་དམངས་ཁྲོད་གླུ་གར་གྱི་བཟང་ཆ་ཡང་འདུས་ཏེ་གཞན་དང་མི་འདྲ་བར་རྣ་བའི་བདུད་རྩིར་གྱུར་ཞིང་ཡིད་ཀྱི་དབང་པོ་འཕྲོག་པའི་ཟློས་གར་ཞིག་ཏུ་ཆགས། རིག་གནས་གསར་བརྗེ་ཆེན་པོའི་སྐབས་སུ་ཨ་ཅེ་ལྷ་མོ་འཁྲབ་སྟོན་མཚམས་མི་འཇོག་ཀ་མེད་དུ་གྱུར་བས་འཁྲབ་གཞུང་དང་འཁྲབ་ཆས། རོལ་ཆ་སོགས་ལ་གཏོར་བརླག་ཆེན་མོ་ཐེབས། སྤྱི་ལོ་ཆིག་སྟོང་དགུ་བརྒྱ་དོན་དགུ་ལོར་གོང་རིམ་དབུ་ཁྲིད་ཀྱི་ཐུགས་ཁུར་དང་རྒྱ་ཆེ་བའི་མི་དམངས་མང་ཚོགས་ཀྱི་རྒྱབ་སྐྱོར་ལ་བརྟེན་ནས་འཁྲབ་སྟོན་རུ་ཁག་བསྐྱར་གསོ་བྱས་ཏེ་བོད་ཀྱི་ཟློས་གར་༼འགྲོ་བ་བཟང་མོ༽དང་༼ཆོས་རྒྱལ་ནོར་བཟང་། ༽༼དྲི་མེད་ཀུན་ལྡན༽བཅས་འཁྲབ་སྟོན་བྱས་པས་ཨ་ཅེ་ལྷ་མོ་ལ་སླར་ཡང་ཞོགས་པའི་ཉི་འོད་འཕྲོས་ཤིང་དཔྱིད་ཀྱི་སྦྲང་ཆར་གསོས་སུ་བབས། སྤྱི་ལོ་ཆིག་སྟོང་དགུ་བརྒྱ་བརྒྱད་ཅུ་གྱ་གཅིག་ལོར་ལོ་ན་གཞོན་པའི་འཁྲབ་སྟོན་པ་ཁག་ཅིག་གསོ་སྐྱོང་བྱས་ཏེ་ཟློས་གར་པ་དང་མདོ་འཛིན་པ། རོལ་མོ་བ། ཆས་གཞུག་པ། བཞད་གད་པ་བཅས་ཟློས་གར་གྱི་ཡན་ལག་ལྔ་ཅི་འཇོན་གང་ཐུབ་ཀྱིས་འཐུས་ཚང་དུ་བཏང་རྗེས་མི་ཉག་གི་དམངས་ཁྲོད་དུ་རླུང་ལྟར་གྲགས་པའི་༼ ཁྱུང་ཟླ་དང་བུ་ཆུང་༽ཞེས་པའི་གཏམ་རྒྱུད་དེ་འཚོལ་སྡུད་དང་ལེགས་སྒྲིག་བྱས་ནས་འཁྲབ་སྟོན་མཛད། འཁྲབ་སྟོན་དེའི་གར་སྟེགས་ཀྱི་རྒྱབ་ལྗོངས་ནི་འཁྲབ་གཞུང་གི་བརྗོད་དོན་དང་མཐུན་ལ་འཁྲབ་མཁན་གྱི་བརྗོད་གཏམ་དང་གཞས་གདངས་བཅས་སྙན་ཞིང་འཇེབས་ལ་གོ་བདེ་བ་དང་གར་གྱི་སྟབས་སྟབས་ལ་མི་ཉག་གི་སྐོར་བྲོའི་ཁྱད་ཆོས་ལྡན་པས་རྒྱ་ཆེའི་ལྟད་མོ་བ་རྣམས་ཀྱི་ཡིད་དབང་འཕྲོག་པས་དགའ་བསུ་ཆེན་པོ་ཐོབ། སྤྱི་ལོ་ཆིག་སྟོང་དགུ་བརྒྱ་གྱ་བཞི་ལོར་དམངས་ཁྲོད་ཀྱི་གཏམ་རྒྱུད་གཞིར་བཟུང་ནས་༼ ཉི་མ་དང་ཟླ་བ༽ཞེས་པ་གསར་སྒྲིག་བྱས་རྗེས་མུ་མཐུད་དེ་ལོ་རྒྱུས་ཀྱི་འཁྲབ་གཞུང་༼ཐང་སྟོང་རྒྱལ་པོ་༽ཞེས་པའང་གསར་དུ་བསྒྲིགས་ཏེ་འཁྲབ་སྟོན་བྱས་པས་ཨ་ཅེ་ལྷ་མོ་ཞེས་གནམ་ལ་འབྲུག་གྲགས་པ་ལྟར་ཕྱོགས་བཞི་རུ་ཁྱབ་ཅིང་ས་ལ་མེ་ཏོག་བཞད་པ་ནང་བཞིན་མིག་ལམ་དུ་མཛེས་པས་དད་ལྡན་མི་ཉག་བ་རྣམས་ཀྱིས་བསྟོད་པའི་ཁ་དར་དཀར་པོ་གནམ་ལ་འཕྱར་ཞིང་མཆོད་པའི་མེ་ཏོག་སེར་པོ་དགུང་ལ་གཏོར། མི་ཉག་བ་ནི་གླུ་ལ་མཁས་ཤིང་གར་ལ་བྱང་བ་དང་དམངས་གཞས་ལེན་དུས་ངག་གི་འགྱུར་ཁུག་མང་ལ་སྐད་གསང་མཐོ་བས་ནམ་མཁའི་སྤྲིན་ཡང་གཏོར་ལ་ཆུ་བོའི་ཉ་མོའང་དཀྲོག་པར་བྱས། ཁམས་མི་ཉག་ཏུ་དར་བའི་ཨ་ཅེ་ལྷ་མོ་ཞེས་ཕྱི་ནང་ཀུན་ལ་སྙན་པའི་གྲགས་པ་འབར་བའི་རྒྱུ་མཚན་ནི།དེ་ནི་སྙན་ངག་དང་རོལ་མོ། གླུ་གར་བཅས་ཕྱོགས་གཅིག་ཏུ་འདུས་པའི་སྒྱུ་རྩལ་ཞིག་ཡིན། སྐྱེས་པ་རྣམས་ཀྱི་རྔམ་བརྗིད་ཆེ་བའི་གོམ་སྟབས་དང་བུད་མེད་རྣམས་ཀྱི་བབ་ཆགས་ཡིད་དུ་འོང་བའི་སྒེག་ཉམས། སྙན་ཞིང་འཇེབས་པའི་གཞས་གདངས་དང་གསོན་ཉམས་དོད་པའི་གཏམ་རྒྱུད་ཀྱི་བྱུང་རིམ་གྱིས་ཆུ་རྒྱུན་ལྟ་བུའི་ཡུན་རིང་གི་ལོ་རྒྱུས་དང་རྣམ་པར་བཀྲ་བའི་ཡུལ་སྲོལ་གོམས་གཤིས་བཅས་རྒན་དར་གཞོན་གསུམ་རྣམས་ཀྱི་མིག་ལམ་དུ་གསལ་པོར་སྟོན་པས་དེ་ནི་མི་ཉག་རིག་གནས་གསལ་རྗེན་དུ་མཐོང་བའི་གཡུ་ཡི་མེ་ལོང་ལྟ་བུ་ཞིག་ཡིན་ནོ། །

   དེ་ཡང་སྐབས་འདིར་མི་ཉག་ཨ་ཅེ་ལྷ་མོ་ཚོགས་པས་འཁྲབ་སྟོན་བྱས་པའི་༼ ཁྱུང་ཟླ་དང་བུ་ཆུང༽་ཞེས་པའི་བརྗོད་བྱའི་སྙིང་པོ་གནད་དུ་དྲིལ་ནས་ངོ་སྤྲོད་བྱས་ན་འདི་ལྟར་ཏེ།  གནའ་སྔ་མོར་ཕ་བཀྲ་ཤིས་དང་མ་མཚོ་མོ་ལེགས་མཛེས་གཉིས་ལ་བུ་སྤུན་གཉིས་སྐྱེས་ཏེ་ཆེ་བ་ལ་ཁྱུང་ཟླ་སྡར་མ་འབྱུང་གནས་ཞེས་སྒྱིད་ལུག་དང་སྡར་མ། རང་རློམ་ཅན་ཞིག་དང་། ཆུང་བ་ལ་བུ་ཆུང་མཐུ་སྟོབས་དབང་ཕྱུག་ཅེས་དཔའ་རྩལ་ལྡན་ལ་བློ་ཁོག་ཡངས་པ་ཞིག་ཡིན། ཡུལ་དེ་ན་དགེ་སྡིག་མི་ཤེས་པའི་བདུད་ཀྱི་རྒྱལ་པོ་ཞིག་ཡོད་པ་དེས་གདུག་རྩུབ་ཀྱི་སྤྱོད་པ་ལག་ཏུ་བསྟར་བས་ཕ་བཀྲ་ཤིས་ཚེ་ལས་འདས་རྗེས་མ་མཚོ་མོ་ལེགས་མཛེས་ཀྱང་གསོན་འདོད་མེད་པར་རང་སྲོག་བློ་ཡིས་བཏང་། དེ་ནས་བུ་སྤུན་གཉིས་དྭ་ཕྲུག་ཏུ་གྱུར་བས་བུ་ཆུང་མཐུ་སྟོབས་དབང་ཕྱུག་གི་སེམས་ནང་འཁོན་འཛིན་མེ་ལྕེ་འབར་ཏེ་དགྲ་ཤ་ལེན་པའི་ཆེད་དུ་མདའ་གྲི་མདུང་རྩལ་སྦྱངས། ཉིན་ཞིག་ལ་གོང་མ་རྒྱལ་པོ་ཆེན་པོ་ངག་དབང་སྙན་གྲགས་ཀྱི་སྲས་མོ་རྨ་བྱ་ལྷ་མོ་ཟེར་བ་དེ་བདུད་ཀྱི་རྒྱལ་པོས་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་བས་རྒྱལ་པོ་ལ་བྲེལ་འཚུབ་ལངས་ཏེ་བློན་པོ་འཕྲིན་ལས་ལྷུན་གྲུབ་བཀའ་བསྒོས་ཏེ་སྲས་མོ་འཚོལ་དུ་བཏང་། བློན་པོས་སྲས་མོ་འཚོལ་བའི་ལམ་བར་དུ་ཁྱུང་ཟླ་དང་འཕྲད། ཁྱུང་ཟླས་སྲས་མོ་དེའི་ལྷམ་རྙེད་པས་བློན་པོས་ཁོ་བཟུང་སྟེ་རྒྱལ་པོའི་དྲུང་དུ་ཁྲིད་ནས་གནས་ཚུལ་འདྲི་རྩད་བྱེད་དུས་ཁྱུང་ཟླས་བུ་མོ་ཞིག་བདུད་ཀྱིས་ཁྲིད་སོང་བ་མཐོང་ཡང་རྒྱལ་པོའི་སྲས་མོ་ཡིན་མིན་མི་ཤེས། ཁོ་བོའི་ནུ་བོ་བུ་ཆུང་གིས་ཀྱང་མཐོང་ཡོད་པས་ཁོ་ཡིས་བདེན་དཔང་བྱ་ཆོག་ཅེས་ཞུས་པས་རྒྱལ་བློན་རྣམས་ཀྱི་བུ་ཆུང་ཡང་འབོད་དེ་གནས་ཚུལ་དྲིས་དུས་བུ་ཆུང་གིས་སྲས་མོ་བདུད་ཀྱིས་ཁྲིད་ཚུལ་གསལ་བོར་ཞུས། དེ་ནས་རྒྱལ་པོས་བུ་ཆུང་ལ་ཁྱོད་ཀྱིས་བདུད་ཀྱི་ཡུལ་ནས་སྲས་མོ་སྐྱབས་དགོས། གལ་སྲིད་བསྐྱབ་ཐུབ་ན་རྒྱལ་སྲིད་ཀྱི་ཕྱེད་ཀའི་བྱ་དགའ་དང་སྲས་མོ་ཡང་ཁྱེད་ཀྱི་བཟའ་ཟླར་གནང་ཆོག་ཅེས་བཀའ་ཕབ་པས་བུ་ཆུང་གིས་ང་ལྟ་བུས་རྒྱལ་ས་མི་ཟིན་ཡང་ཕ་མ་གཉིས་ཀྱི་དགྲ་ཤ་ལེན་པའི་ཞོར་དུ་རྒྱལ་པོའི་སྲས་མོ་བསྐྱབ་ན་ཆོག་ཅེས་ཞུས་ཏེ་སོང་། དེ་ནས་བདུད་ཀྱི་དོང་ཞིག་གི་ནང་དུ་སྲས་མོ་བཙུད་ཡོད་པ་དང་འཕྲད་པས་སྲས་མོས་སྐྱབས་འཇུག་གི་རེ་བ་ཞུས་པ་བུ་ཆུང་གིས་ཁས་བླངས་ཏེ་དོང་ནང་དུ་ཐག་པ་དཔྱངས་ཏེ་ཐབས་མཁས་ཀྱིས་དོང་ནང་ནས་བསྐྱབས་པས་སྲས་མོར་དགའ་སྤྲོ་སྐྱེས་ཤིང་སེམས་འགུལ་ཐེབས་ཏེ་བུ་ཆུང་ལ་མི་ཚེའི་ཚེ་རོགས་བྱ་རྒྱུའི་རེ་བ་ཞུས་ཀྱང་བུ་ཆུང་གིས་ཡུལ་འདི་ཡི་བདུད་རྣམས་ཆམ་ལ་ཕབ་དགོས་པས་ཁོམ་ལོང་མེད་ཅེས་དང་དུ་མ་བླངས་པར་དོང་ནང་དུ་བདུད་དང་འཐབ་མོ་བྱས། སྲས་མོས་བུ་ཆུང་དོང་ནས་བསྐྱབ་འདོད་ཀྱང་རྒྱལ་པོས་དོང་ནས་ཡར་འཛེགས་བྱེད་ཀྱི་ཐག་པ་བཅད་དེ་བསྐྱབ་ཏུ་མ་འཇུག  ཕུ་བོ་ཁྱུང་ཟླ་སྡར་མ་འབྱུང་གནས་ལ་ནི་ནུ་བོ་ལ་རོགས་རམ་བྱེད་པའི་སྤོབས་པ་དང་ཆོད་སེམས་ཅི་ཡང་མེད་པས་དོང་ཁར་ལངས་ཀྱང་མ་ཕོད། ནུ་བོས་སྲས་མོ་བསྐྱབས་ཐུབ་པས་ད་ནས་རྒྱལ་པོས་གནང་བའི་བྱ་དགའ་ང་ལ་དབང་ཐག་ཆོད་རེད་སྙམ་སྟེ་དགའ་སྤྲོ་དཔག་མེད་སྐྱེས་ཀྱང་རྒྱལ་པོས་ཁོ་ལ་ཁ་ཡ་མ་བྱས་པར་སྲས་མོ་ཁྲིད་དེ་ཕོ་བྲང་དུ་ལོག  བུ་ཆུང་གིས་དོང་ནང་དུ་ཕར་ལྟ་ཚུར་ལྟ་བྱེད་དུས་ཀླུ་འབྲུག་མཐོང་། ཀླུ་འབྲུག་གིས་ངས་ལོ་བཅུའི་རིང་ལ་བདུད་དང་འཐབ་ཀྱང་ཕམ་ཁ་བླངས་པས་ལྕགས་ཐག་གིས་བཅིངས་ཏེ་འདི་རུ་ལྷག  ད་ནས་སྟབས་ལེགས་པས་དཔའ་བོ་ཁྱེད་ཀྱིས་བསྐྱབ་རོགས་ཞེས་ཞུས་པས་བུ་ཆུང་གིས་གྲི་འཕྱར་ཏེ་འཆིང་སྒྲོགས་གཏོར། དེ་ནས་ཀླུ་འབྲུག་གིས་བུ་ཆུང་ལ་ནོར་བུ་ཞིག་གནང་བ་མ་ཚད་རང་གི་རྒྱབ་ཏུ་ཆིབས་སུ་བཅུག་སྟེ་གཉིས་ཀ་དོང་ལས་ཕྱིར་ཐོན། དོང་ལས་ཐར་རྗེས་བུ་ཆུང་གིས་ཀླུ་འབྲུག་གིས་གནང་བའི་ནོར་བུ་ཁྱེར་ཏེ་ཡུལ་དུ་ལོག  ཕུ་བོས་ཁྱུང་ཟླས་ནུ་བོ་བུ་ཆུང་མཐོང་དུས་ཧ་ལས་ཏེ་ཡིད་མ་ཆེས་པར་གྱུར་ཡང་བུ་ཆུང་གིས་ལག་ཏུ་བཟུང་བའི་ནོར་བུ་མཐོང་རྗེས་དགའ་སྤྲོ་ཚད་མེད་སྐྱེས། དེ་ནས་བུ་སྤུན་གཉིས་ཀྱི་ནོར་ལུག་དེད་དེ་འབྲོག་ས་སྤོ་བའི་ཉིན་ཞིག་ལ་བ་མོ་ཞིག་ཆུ་ནང་དུ་ལྷུང་། བུ་ཆུང་གིས་ལམ་སང་སྐེད་པར་ཐག་པ་བཏགས་ཏེ་སྣེ་མོ་ཕུ་བོ་ལ་བཟུང་བཅུག་སྟེ་བ་མོ་ཆུ་ནང་ནས་འཐེན། ཁྱུང་ཟླས་མ་རུང་ཁོག་བཅངས་ཀྱིས་ནོར་བུ་ཆུ་ཡིས་ཁྱེར་འགྲོ་བའི་ཉེན་ཁ་ཆེ་བས་ངའི་ལག་ཏུ་སྤྲོད་དགོས་ཞེས་ནན་གྱིས་ཞུས་པས་བུ་ཆུང་གིས་དོགས་ཟོན་ཅི་ཡང་མེད་པར་ནོར་བུ་དེ་ཕུ་བོ་ཁྱུང་ཟླའི་ལག་ཏུ་སྤྲད། ཧམ་སེམས་དང་འདོད་རྔམ་ཅན་གྱི་ཕུ་བོས་ལག་པས་བཟུང་བའི་ཐག་པ་བཏང་བས་ནུ་བོ་བུ་ཆུང་ཆུ་ནང་དུ་ལྷུང་ཡང་ཀླུ་འབྲུག་གིས་མཁྱེན་ཏེ་ཁྱུང་ཟླའི་ལག་ནས་ནོར་བུ་འཕྲོག་པ་མ་ཟད་བུ་ཆུང་ཡང་ཆུ་ནང་ནས་བསྐྱབས་ཏེ་ཁྱུང་ཟླ་ལ་ཐ་ཤལ་གྱི་སྤྱོད་པ་ལ་འགྱོད་གཤགས་བྱེད་དགོས་པའི་གནས་ལུགས་གསུངས་པ་མ་ཚད། ཕ་མ་གཅིག་གིས་གསོས་པའི་སྤུན་ཟླའི་ནང་དུའང་བཟང་ངན་གྱི་ཁྱད་པར་ཡོད་པས་མི་ངན་སྤྱོད་རྩུབ་ཅན་ཡུལ་དུ་གནས་པ་ལ་མི་བཟང་གཤིས་འཇམ་ཅན་བུ་ཆུང་ལྟ་བུ་རྣམས་ཀྱིས་སྤྱང་གྲུང་འཛོམས་པར་གྱིས་ཞེས་སྐུལ་མའང་མཛད། སྐབས་དེ་དུས་སྲས་མོ་རྨ་བྱ་ལྷ་མོ་ཡིས་ཉིན་མཚན་མེད་པར་བུ་ཆུང་དྲན་པས་ཕོ་བྲང་ནང་དུ་བསྡད་མ་འདོད་པར་བུ་ཆུང་འཚོལ་དུ་ཡོང་། རྒྱལ་བློན་རྣམས་ཀྱིས་ཇི་ལྟར་བཀག་ཀྱང་འགོག་མ་ཐུབ་པར་སྲས་མོ་དང་བུ་ཆུང་གཉིས་སླར་ཡང་འཕྲད། རྒྱལ་པོས་བློན་པོ་རྣམས་ཁྲིད་དེ་བུ་ཆུང་དམར་གསོད་གཏོང་བསམ་ཡང་དཔའ་མཛངས་གཉིས་ལྡན་གྱི་བུ་ཆུང་མཐུ་སྟོབས་དབང་ཕྱུག་གིས་རྒྱལ་བློན་རྣམས་ཆམ་ལ་ཕབ་མ་ཟད་རྒྱལ་པོ་ལ་དགག་ལན་རྒྱག་ཐབས་བྲལ་བའི་ཐ་ཚིག་བསྒྲགས་པས་རྒྱལ་པོས་ལྐུགས་པའི་བརྟུལ་ཞུགས་མི་འཛིན་ཐབས་མེད་དུ་གྱུར་ཏེ་མཐར་སྲས་མོ་དང་བུ་ཆུང་གཉིས་ཀའི་འདོད་དོན་གྲུབ་སྟེ་བདེ་ལྡན་གྱི་མ་འོངས་མདུན་ལམ་དུ་སྐྱོད་འགོ་ཚུགས་སོ། །

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1