གཙོ་ངོས།>> དམངས་སྲོལ།>>རྒྱན་གོས།

རྩོམ་སྒྲིག་པ།ཡོང་ཁུངས།བོད་ལྗོངས་ཉིན་ཚགས། སྤེལ་དུས། ༢༠༡༨ལོའི་ཟླ་བ་༠༤ཚེས་༠༢ཉིན།

༄༅།། འབྲི་གུང་གི་ཞྭ་མོ།

        བོད་རིགས་ས་ཁུལ་གཞན་དང་འདྲ་བར་འབྲི་གུང་ཁུལ་དུ་ཡང་ཞྭ་མོ་སྣ་ཚོགས་ཡོད་པའི་ནང་ནས་ཡུལ་གྱི་ཁྱད་ཆོས་ལྡན་པའི་སྣམ་བུའི་ཞྭ་མོར་མི་རྣམས་ཀྱིས་ཧ་ཅང་དགའ་པོ་བྱེད་ཀྱི་ཡོད། ཤོད་སྲོལ་ལ་དུས་རབས་བརྒྱད་པའི་སྐབས་སུ་སློབ་དཔོན་པདྨ་འབྱུང་གནས་གཏེར་སྒྲོམ་གྲོང་ཚོར་ཕེབས་པས་ཡུལ་དེའི་དགེ་འདུན་པ་ཚོས་སློབ་དཔོན་གྱི་རྗེས་འཇུག་པའི་ཚུལ་དུ་ཚོས་མདོག་དམར་པོ་གཞིར་བྱས་པའི་ཐོག་གོས་ཆེན་སེར་པོ་དང་། མཐའ་སྒྲིལ་དུ་གསེར་སྐུད་བཏང་བའི་སྣམ་བུའི་ཞྭ་མོ་ཞིག་གྱོན་པས། འབྲི་གུང་ཁུལ་གྱི་བུད་མེད་ཀྱིས་སྣམ་བུའི་ཞྭ་མོའི་བཟོ་ལྟ་དེར་དཔེ་བལྟས་ནས་བཟོས་པ་ཞིག་ཡིན་ཟེར་ལ། ད་དུང་དམངས་ཁྲོད་ཀྱི་ཤོད་སྲོལ་གཞན་ཞིག་ལ་འབྲི་གུང་བཀའ་བརྒྱུད་ཀྱི་ཤིང་རྟའི་སྲོལ་འབྱེད་པ་སྐྱོབ་པ་འཇིག་རྟེན་གསུམ་མགོན་མཆོག་གིས་སློབ་དཔོན་པདྨའི་བཀའ་ལུང་ལྟར་འབྲི་གུང་གི་སྣམ་བུའི་ཞྭ་མོ་བཟོས་གནང་བས། བཟོ་རྒྱུན་ད་བར་མ་ཉམས་པར་གྲགས། གང་ལྟར་འབྲི་གུང་སྣམ་བུའི་ཞྭ་མོ་ནི་མཁའ་འགྲོ་མའི་དབུ་རྒྱན་དང་འབྲི་གུང་གི་སྲུང་མ་ཨ་ཕྱི་ཆོས་སྒྲོན་གི་དབུ་ཞྭའི་ཐོག་གི་རྒྱལ་བ་རིགས་ལྔའི་དབུ་རྒྱན་དང་ཧ་ཅང་འདྲ་པོ་ཡོད་ཅིང་། སྣམ་བུའི་དབུ་ཞྭ་དེའི་མཐའ་སྣེ་ལ་ལི་སྨི་7ཡས་མས་ཀྱི་གོས་ཆེན་བཏང་ཡོད། ཞྭ་ཏོག་གི་མཐའ་གཉིས་དང་དབུས་སུ་འཚེམ་དྲུབ་ཀྱི་རི་མོས་རྒྱལ་བ་རིགས་ལྔ་དང་རིགས་གསུམ་མགོན་པོ་མཚོན་པ་དང་། དབུས་ཀྱི་ཚོས་གཞི་ནག་པོ་དེས་དབུ་སྐྲ་མཚོན་པ། མེ་ཏོག་པདྨ་བརྒྱན་པ་དེས་དབུ་སྐྲར་རྡོ་རྗེ་ཕ་ལམ་བརྒྱན་པ་མཚོན། རྒྱབ་ངོས་སུ་རྭ་ཅོ་འདྲ་བ་གཉིས་ཡོད་པ་ནི་འབྲི་གུང་མཐིལ་མགོན་ཕྱག་འདེབས་སྐབས་ཡོད་པའི་སྤྲུལ་པའི་འབྲི་ཞིག་གི་རྭ་ཅོའི་མཚོན་དོན་ཡིན་པ་སོགས་ཀྱི་ཤོད་སྲོལ་ཡོད། ད་དུང་ལོ་ན་ཆེ་ཆུང་མི་འདྲ་བར་ཞྭ་མོ་སྒོར་དབྱིབས་ལ་གོས་ཆེན་གྱི་སྐེད་ཆིངས་ཐོག་མེ་ཏོག་སྣ་ཚོགས་དང་རིགས་ལྔའི་དབྱིབས་ཀྱི་གོས་ཆེན་གྱི་འཚེམ་དྲུབ་རྣམ་པར་བཀྲ་བ་ཞིག་རྒྱག་གི་ཡོད་པ་མ་ཟད། མེ་ཏོག་གྲ་རྒྱས་མིན་སྣ་ཚོགས་རང་ཉིད་ཀྱི་མོས་པ་ལྟར་འདེམས་ཆོག་གི་ཡོད་པ་རེད། དེ་ལྟར་གྱོན་མཁན་ཚོའི་ལོ་ཚོད་མི་འདྲ་བར་གཞིགས་ནས་ཞྭ་མོ་ཅུང་མི་འདྲ་བ་ཡོད་པ་དང་། དུས་ཆེན་དང་རྟེན་འབྲེལ་སྐབས་སུ་ཞྭ་མོ་དེ་རིགས་མེད་དུ་མི་རུང་བའི་གཟབ་མཆོར་གྱི་གྲས་ཤིག་ཡིན་ལ། ཞྭ་མོ་དེ་གྱོན་པའི་བུད་མེད་ཚོར་འབྲི་གུང་གི་སྲུང་མ་ཨ་ཕྱི་ཆོས་སྒྲོན་གྱིས་མགོན་སྐབས་གནང་གི་ཡོད་པའི་ཤོད་སྲོལ་ཡོད།

        འབྲི་གུང་སྣམ་བུའི་ཞྭ་མོ་གྱོན་མཁན་གཙོ་བོ་ནི་མལ་གྲོ་གུང་དཀར་རྫོང་རྩ་ཞོལ་ཤང་དང་། རྨམ་པ་ཤང་། ཉི་མ་ལྕང་རྭ་ཤང་བཅས་ཀྱི་བུད་མེད་ཡིན་ཞིང་། ད་ཆ་འཚེམ་བཟོ་བ་ཚོས་དུས་རབས་ཀྱི་དགོས་མཁོ་དང་བསྟུན་ནས་ལག་རྩལ་ལ་འགྱུར་ལྡོག་གཏོང་བཞིན་ཡོད། ད་དུང“མལ་གྲོ་གུང་དཀར་རྫོང་སྣམ་ཞྭ་སྲོལ་རྒྱུན་འཐག་ལས་ལས་སྣོན་མཉམ་ལས་ཁང”ཞེས་པ་ཞིག་བཙུགས་ཡོད་པ་དང་རྒྱུན་འཛིན་པ་བགྲེས་སོང་གཉིས་ཀྱང་ཡོད་པས་འབྲི་གུང་པའི་ཞྭ་མོའི་བཟོ་རྒྱུན་ལ་ཚེ་སྲོག་གི་འོད་སྣང་གསར་པ་ཞིག་རྒྱས་བཞིན་ཡོད།

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1