གཙོ་ངོས།>> འཕྲོད་བསྟེན།>>བོད་ཀྱི་གསོ་རིག

རྩོམ་སྒྲིག་པ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༡༨ལོའི་ཟླ་བ་༠༤ཚེས་༠༨ཉིན།

༄༅།། བོད་སོག་གསོ་རིག་ལས་ཁམས་གསོ་བདེ་སྲུང་དང་སྲོལ་རྒྱུན་བཅོས་ཐབས་སྐོར། གཅིག

        དགུན་སྟོད་ནི་བོད་རྩིས་ཀྱི་ཟླ་བཅུ་པ་ནས་ཟླ་བཅུ་གཅིག་པའི་བར་ཡིན། དུས་ཚིགས་དེའི་ནང་གནམ་གཤིས་ལ་གྲང་ངར་ཆེ་ཞིང་ལུས་ཀྱི་བ་སྤུའི་བུ་ག་ཟུམ་པར་བྱེད་པས། མིའི་ལུས་སྟེང་གི་དྲོད་ཚད་གསོག་འཇོག་དང་རྙིང་འདོར་གསར་ལེན་བྱེད་ཚད་ཇེ་མགྱོགས་སུ་འགྲོ་བཞིན་ཡོད།
        བཟའ་བཏུང་གི་སྐོར་ནས་མངར་སྐྱུར་ཁ་གསུམ་གྱི་ཟས་རིགས་མང་དུ་ཟོས་ན་ལེགས་པ་དང་། རྒྱུན་པར་ཤའི་ཁུ་བ་དང་མར། འོ་བཟོས་བཟའ་ཆས་སོགས་སྣུམ་ཅན་གྱི་ཟས་རིགས་བསྟེན་ན་བཟང་།
        འགྲོ་འདུག་གི་ཐད་ནས་རྒྱུན་པར་ཉི་མར་ལྡེ་ནས་གོས་དྲོན་པོ་གྱོན་པ་དང་། ཉི་འོད་ཡོད་པའི་ཁང་པའི་ནང་བསྡད་ནས་ལུས་ཕུང་སྦྱོང་བརྡར་རྒྱུན་འཁྱོངས་བྱ་དགོས།

        ཕྱི་བཅོས་རིམས་འགོག་བྱེད་པར་མེར་སྲོ་བ་དང་དྲོད་བཅོས་བྱེད་པ། རྒྱུན་པར་ཏིལ་སྣུམ་གྱིས་ལུས་ཡོངས་འཕུར་ན་ལེགས།        

        དགུན་སྨད་ནི་བོད་རྩིས་ཀྱི་ཟླ་བཅུ་གཉིས་པ་ནས་ཟླ་དང་པོའི་བར་ཡིན། དུས་ཚིགས་དེའི་ནང་གནམ་གཤིས་སྔར་ལས་ཇེ་འཁྱགས་སུ་འགྲོ་བཞིན་ཡོད་པས། དགུན་དུས་ཀྱི་ལུས་ཕུང་བདག་གཅེས་བྱེད་ཐབས་ལྟར་ལུས་པོ་གསོ་བཅོས་བྱ་དགོས། བཟའ་བཏུང་གི་སྐོར་ནས་ཟས་རིགས་སྣུམ་ཅན་བསྟེན་ན་ལུས་སྟོབས་རྒྱས་པར་ཕན་པ་ཡོད།

        འགྲོ་འདུག་གི་ཐད་ནས་ཉི་འོད་ཕོག་ཡུན་རིང་བའི་ཁང་པའི་ནང་སྡོད་པ་དང་། མཚན་མོ་དུས་ལྟར་གཉིད་པ། གཞན་ད་དུང་གོས་དྲོན་པོ་གྱོན་ནས་ཉི་མར་ལྡེ་བ་དང་ལུས་ཕུང་སྦྱོང་བརྡར་རྒྱུན་འཁྱོངས་བྱ་དགོས། འཁྲིག་སྤྱོད་ཚད་རན་ཡིན་མིན་དེ་ལུས་ཟུངས་གསོ་བ་དང་ཚེ་ཐག་ཇེ་རིང་དུ་གཏོང་བར་འབྲེལ་བ་གལ་ཆེན་ཡོད།

        དུས་ཚིགས་རེ་རེ་ལའང་ལུས་ཟུངས་གསོ་ཐབས་མི་འདྲ་བ་རེ་ཡོད། བོད་ལུགས་གསོ་བ་རིག་པའི་ནང་དུས་ཚོད་ལྟར་ལུས་ཟུངས་གསོ་ཐབས་གཏན་འཁེལ་བྱེད་བཞིན་ཡོད་པས་ལུགས་དང་མཐུན་པའི་བྱེད་ཐབས་ཤིག་རེད།


གཉིས། བོད་སོག་གསོ་བ་རིག་པའི་ཁྲོད་ཀྱི་བཟའ་བཏུང་གི་གསོ་ཐབས།
        བོད་སོག་གསོ་བ་རིག་པའི་གཞུང་ལུགས་ནང་བཟའ་བཏུང་སྤྱོད་ཤེས་བྱེད་པ་ནི་ལུས་ཕུང་བདེ་ཐང་དང་རིམས་འགོག་ལ་འབྲེལ་བ་ཡོད་པར་བརྗོད་ཡོད་ལ། དེར་མཐོང་ཆེན་གནང་ཡོད་པར་མ་ཟད་གཏན་འཁེལ་གསལ་པོར་བྱས་ཡོད། སྲོལ་རྒྱུན་གྱི་བསམ་བློ་ལྟར་ན་བཟའ་ཆས་མང་ཤོས་ནི་ལོ་ཏོག་དང་། སྣུམ་ཞག ཤ་རིགས། སྔོ་ཚོད། གཤེར་གཟུགས་བཅས་ཀྱི་རིགས་ཡིན།
        ལོ་ཏོག་ཟེར་བ་དེ་འབྲས་དང་ཁྲེ། བྲ་བོ། ནས་སོགས་ལ་ངོས་འཛིན་གྱིན་ཡོད། ཟས་རིགས་དེའི་རིགས་ཀྱིས་མིའི་ལུས་སྟེང་གི་ཁུ་བ་ཇེ་མང་དུ་གཏོང་ཐུབ། ལོ་ཏོག་མང་པོ་ཞིག་རོ་མངར་བའི་རིགས་ཀྱི་ཁོངས་སུ་གཏོགས་པས་འཇུ་སླ་བ་རེད། དཔེར་ན་འབྲས་ནི་འཇུ་སླ་བའི་རིགས་སུ་གཏོགས་པས། རླུང་མཁྲིས་བད་ཀན་གྱི་ཉེས་པ་འཁྲུག་པ་འགོག་ཐུབ་པར་མ་ཟད་ཁུ་བ་ཇེ་མང་དུ་བཏང་ནས་ལུས་པོའི་ཤ་གནད་ལྷོད་པོར་གཏོང་ཐུབ། རུས་པར་ཆག་སྐྱོན་འབྱུང་སྐབས་ཁྲེ་རིགས་བསྟེན་ན་བཟང་མོད། འོན་ཀྱང་ཁྲེ་ཡིས་མིའི་ལུས་སྟེང་གི་གཉན་ཚད་ཤུགས་ཆེར་གཏོང་གིན་ཡོད།
        སྲན་རིགས་ནི་འཇུ་སླ་ལ་མངར་བ་དང་བསིལ་བའི་རིགས་སུ་གཏོགས་པས་ཁོག་པ་བཤལ་བར་ཕན་པ་དང་། ཁྲག་དང་མཁྲིས་པ། ཚི་ལི་ཇེ་མང་དུ་གཏོང་ཐུབ། སྲན་རིགས་ཟས་སུ་བསྟེན་ཆོག་པ་ལས་གཞན་སྲན་ཕྱེ་ལུས་སྟེང་དུ་འཕུར་ཆོག ཏིལ་འབྲས་ནི་བསིལ་བའི་རིགས་སུ་གཏོགས་པས་ཁུ་བ་ཇེ་མང་དུ་གཏོང་ཐུབ་པར་མ་ཟད། རླུང་ནད་གཞོམ་པར་ཕན།ཚིལ་ལུ་རིགས་ལ་བསིལ་བ་དང་འཇུ་དཀའ་བ། མངར་མོའི་རང་བཞིན་ལྡན་པས། ལུས་ཟུངས་གསོ་བར་ཕན་ལ་ལུས་ཟུངས་ཞན་པ་དང་། བུད་མེད་དང་རྒན་པའི་རིགས་ཀྱིས་བསྟེན་ན་ལེགས། མར་ནི་བསིལ་བའི་རང་བཞིན་ཡིན་པས་བཞིན་མདངས་ཇེ་བཟང་དུ་གཏོང་ཐུབ་ལ་སྟོབས་ཤུགས་རྒྱས་སུ་འཇོག་ཐུབ། མར་རྙིང་པ་བསྟེན་པ་མང་ཆེ་ན་བརྗེད་ངས་ཆེ་ཞིང་ལུས་སྟོབས་ཞན་པར་འགྱུར། བོད་ལུགས་གསོ་རིག་ནང་ཚིལ་ལྡན་ཟས་རིགས་བསྟེན་པར་མཐོང་ཆེན་བྱེད་ཀྱིན་ཡོད། དེ་ནི་མི་རིགས་ཀྱི་གོམས་གཤིས་དང་མཐོ་གྲང་ས་ཁུལ་གྱི་རང་བྱུང་ཆ་རྐྱེན་ལ་འབྲེལ་བ་ཡོད།
        ཤ་ནི་བོད་རིགས་མང་ཚོགས་ཀྱི་རྒྱུན་ཟས་གཙོ་བོར་གྱུར་ཡོད། བྱེ་བྲག་ཏུ་བཤད་ན་བོད་རིགས་མང་ཚོགས་ཀྱི་ཟ་མའི་ནང་རྒྱུན་པར་ཤ་རིགས་མཐོང་ཐུབ་པ་དང་། ལུག་ཤ་ནི་དྲོད་དང་སྟོབས་རྒྱས་པར་ཕན་པས་ཟས་ཀྱི་ཡི་ག་འབྱེད་པ་དང་ཟས་འཇུ་བར་ཕན། ལུས་སྟོབས་ཇེ་དྲག་ཏུ་གཏོང་ཐུབ་པར་མ་ཟད། རླུང་ནད་དང་བད་ཀན་གྱི་ནད་བཅོ་བར་ཕན་འབྲས་ལྡན། སྐམས་ཤ་ནི་དྲོད་དང་སྟོབས་རྒྱས་པར་ཕན་པས་གྲང་བའི་ནད་དང་ཕོ་བའི་ནད།མཆིན་པའི་ནད་སོགས་གྲང་བའི་རང་བཞིན་གྱི་རིམས་ནད་འགོག་བཅོས་བྱེད་ཐུབ། ། 

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1