གཙོ་ངོས།>> རྩོམ་རིག>>ལྷུག་རྩོམ།

སྟག་རིག་འབྲུག་ཐར། རྩོམ་སྒྲིག་པ།ཡོང་ཁུངས།མཚོ་སྔོན་བོད་ཡིག་གསར་འགྱུར། སྤེལ་དུས། ༢༠༡༨ལོའི་ཟླ་བ་༠༥ཚེས་༡༦ཉིན།

༄༅།། རྩེད་དགོད་ས་རྡུལ་ལ་ཐིམ་པའི་ལོ་ཟླ།

མཚོ་ལྷོ། སྟག་རིག་འབྲུག་ཐར།
        ང་ཚོ་སུ་དང་གང་ལ་མི་བརྗེད་ཆུང་འདྲིས་ཀྱི་གཏམ་རྒྱུད་བག་ཙམ་རེ་ཡོད་ལ། བག་ཆགས་ཟབ་མིན་གྱིས་དོན་དག་ལ་ལ་ནི་རྡོ་བརྐོས་རི་མོ་བཞིན་ལོ་ཟླའི་གཙང་པོ་རྒྱང་རིང་དུ་ཇི་ལྟར་བྱེར་ཡང་རྦད་དེ་གསུབ་ཐབས་མེད། འོན་ཏེ་དོན་དག་རེ་འགའ་ནི་རབ་རིབ་མག་མོག་ཙམ་ལས་ཡིད་ངོར་གསལ་ཐག་ཆོད་པ་ཞིག་དྲན་རྒྱུ་མི་འདུག
        ལོ་ངོ་དེ་འདྲ་མང་པོ་ཞིག་འགོར་ན་ཡང་། དུས་ཀྱི་མདའ་ཁབ་ཕྱིར་བཟློགས་ཏེ་བྱིས་དུས་ཀྱི་ལོ་ཟླར་ཕྱིར་དྲན་རེ་བྱེད་དུས། ཡིད་ཀྱི་གུར་ཁང་དུ་སྡུག་གུར་བཞད་ཡོང་བ་དང་མིག་གི་རྒྱལ་མོར་ཅིག་ཅར་དུ་འཚང་འོངས་པ་ནི་སྡེ་འདབས་ཀྱི་མ་ཡུམ་སློབ་ཆུང་གི་སྒོ་ཐེམ་ལ་གོམ་ཁ་ཐོག་མར་བསྒྱུར་བའི་འདས་དོན་དེ་རེད།
        འབྲས་ལྡན་སྟོན་གྱི་བཙས་མ་བརྔས་རྗེས་སོ་ནམ་པའི་གདོང་ལ་དགའ་བའི་སྤྲོ་འཛུམ་རྒྱས་པའི་དུས་ཚིགས་དེར། རྒྱུ་བ་རས་ཀྱིས་བཟོས་པའི་དཔེ་ཁུག་ཆུང་ཆུང་ཞིག་རྒྱབ་ལ་དཔྱངས་ཏེ་དྲིན་ཆེན་ཨ་མ་དང་ལྷན་དུ་སློབ་གྲྭར་ཆས་པ་ཡིན། དེའི་དུས་ལོ་ན་བདུན་ཙམ་སོན་པའི་བྱིས་པ་བསམ་མེད་ཅིག་ཡིན་མོད། རྦ་རླབས་ལྟར་གནོན་མི་ཐུབ་པའི་དགའ་སྤྲོའི་ཚོར་བ་ཞིག་བསྣམས་ཏེ་ཨ་མའི་ལག་པར་དམ་དུ་འཇུས་ནས་སློབ་གྲྭའི་སྒོ་ཆེན་བརྟོལ། སྒོ་ཆེན་ནང་དུ་འཛུལ་བའི་ཚེ་ཐོག་མར་ཆུ་བུར་མིག་ཟུང་ར་སྐོར་ཆུང་ཆུང་གི་ག་ས་གང་ན་དཔེ་ཀློག་ལ་འཐིམ་པའི་བྱིས་པ་ཚོ་དང་ལྷག་པར་ཡར་རྒྱུག་མར་རྒྱུག་སྒོས་བདའ་འདེད་བྱེད་པའི་བྱིས་པ་པྲ་ཆལ་གྱི་རྩེད་འཇོའི་རྣམ་པར་ཕྱོགས། ཏག་ཏག་སློབ་གྲྭའི་སྒོ་གླེགས་ཐོག་མར་རྡུང་དུས་ངའི་དྲིན་ཆེན་ཕ་མས་ཀྱང་སློབ་བུ་ཆུང་ཆུང་འདི་དག་དང་མཚུངས་པར་ཤེས་བྱའི་རྒུམ་བུ་མཉམ་དུ་བཏུས་ཏེ་མ་འོངས་པར་རིག་གནས་ཡོན་ཏན་གྱི་མཁའ་དབྱིངས་སུ་ལྡིང་སྐོར་རྒྱག་པའི་རིག་པའི་བུ་རྒོད་ཅིག་ཏུ་འགྱུར་བར་རེ་བ་འཆང་གིན་ཡོད་ལས་ཆེ།
        དེ་ལྟར་ལོ་བདུན་ལ་སོན་ཞིང་འཛིན་མའི་ཁྱོན་ཡོངས་སེར་པོ་གསེར་མདོག་གིས་བརྒྱན་པའི་སྟོན་མཇུག་དེར་དྲིན་ཆེན་ཕ་མའི་རེ་བ་བརྒྱ་ཕྲག་ཅིག་དཔེ་ཁུག་ཆུང་ཆུང་ནང་དུ་བཅུག་སྟེ་སློབ་རའི་སྐྱེད་ཚལ་དུ་ཐོག་མར་བཏང་བ་ཡིན་ཞིང་། ང་ལའང་མཚར་སྣང་དང་དགའ་སྣང་འདྲེས་མའི་སེམས་ཚོར་ཞིག་དང་བཅས་སློབ་གྲྭའི་འཚོ་བའི་རོ་བྲོ་ཐོག་མར་མྱོང་བའི་སྐལ་བ་ཤར། དགེ་རྒན་གྱི་བཀོད་སྒྲིག་ལྟར་དུ་སོ་ཕག་གིས་བཞེངས་པའི་སྒལ་གཟེངས་སློབ་ཁང་ཞིག་ལ་ཁྲིད་ཅིང་དེ་རུ་མདོག་ཡལ་ཞིང་རྐོ་ཐིག་མངོན་པའི་ཅོག་ཙེ་འགའ། རྐུབ་སྟེགས་རྙིང་རུལ་ཞིག་དང་བཅས་ང་དང་ན་སོ་མཉམ་པའི་སྡེ་བའི་བུ་ཕྲུག་སྐོར་ཞིག་དང་ཆབས་ཅིག་ཏུ་རིག་པའི་མེ་ཏོག་འཐུ་བའི་མཐུན་རྐྱེན་སྦྱར་བྱུང་།
        ཕྱིར་གཞིགས་རེ་བགྱིས་ཚེ་ད་ལྟ་ནང་བཞིན་བ་གམ་ཁང་བརྩེགས་མངོན་པའི་གཞལ་ཡས་ཁང་ལྟ་བུའི་སློབ་ཁང་དང་མདོག་ལེགས་ཤིང་མིག་དབང་འཕྲོག་པའི་ཅོག་ཙེ། བདེ་འབོལ་ལེའི་རྒྱབ་བསྙེས་རྐུབ་སྟེགས་སྤུས་ལེགས་སུ་སྡོད་པའི་ལས་སྐལ་མེད་ནའང་། ཉིན་དེར་རང་ཉིད་ལ་དབང་བའི་འདུག་གནས་ཤིག་ཐེམས་པ་ནི་ད་ལྟའི་མཐར་ཕྱིན་སློབ་མར་བྱ་བའི་ལས་བགོས་གནང་བ་ལྟ་བུའི་དགའ་ཚོར་ཆེན་པོ་སྐྱེས་ཏེ་ལག་ཟུང་རྒྱབ་ལག་བཅོས་ཤིང་རྐུབ་སྟེགས་ལས་ཀྲོང་ངེར་ཙོག་པ་སོགས་ནི་ཁ་སང་བྱུང་བའི་འདས་དོན་དང་འདྲ་བར་བརྗེད་རྒྱུ་ཞིག་མི་འདུག
        ཀ་ཁ་ག་ང་ཆོས་ཀྱི་སྒོ། ཀུ་རེ་རྩེ་མོ་གཏམ་གྱི་སྒོ། ཨ་ལ་ལ་མོ་གླུ་ཡི་སྒོ་ཞེས་པ་ལྟར་ཕྱི་ཉིན་ནས་བཟུང་སྟེ་སློབ་ཁང་ནང་གི་རྩིག་ངོས་ནར་མོར་ཚོན་ནག་བྱུགས་པའི་སྒོ་སམ་སྟེང་དུ་རྒན་རིན་ཆེན་ལགས་ཀྱིས་དབུ་ཁྱུད་དང་ལྷན་དུ་སླའོ་ཞེས་པའི་ཡིག་འབྲུ་ཆེན་པོ་ཞིག་བྲིས་ཤིང་། དེའི་འགབ་ཏུ་ཀ་ཁ་ག་ང་སོགས་གསལ་བྱེད་སུམ་ཅུའི་སྡེ་བ་རེ་རེ་བར་མཚམས་བཅད་ཅིང་ཡིག་གཟུགས་ཅུང་ཆེ་བའི་སྒོ་ནས་གསལ་གྱི་ལེར་བྲིས་ཏེ་ཀ་ཁའི་ཀློག་འདོན་ལ་སྣེ་ཁྲིད་པའི་སྟ་གོན་བྱས་བྱུང་། སློབ་ཁྲིད་དངོས་སུ་མགོ་མ་བརྩམས་གོང་དུ་ང་ཚོར་ལག་ཟུང་རྒྱབ་ལ་བསྣོལ་དུ་བཅུག་ཅིང་། བྲང་ཁ་ལྡིར་ལྡིར་དུ་མངོན་པ། མིག་ཟུང་སྒོ་སམ་ངོར་ཧྲིག་གེར་ཅེར་དགོས་པའི་རེ་བ་ནན་མོ་བཏོན་ཏེ་སྨྱུག་མ་རིང་པོ་ཞིག་ཁྲིད་དབྱུག་གི་ཚུལ་དུ་སྒོ་སམ་ནར་དབྱིབས་ཀྱི་ངོར་ཆེ་རུ་མངོན་པའི་གསལ་བྱེད་ཡིག་འབྲུ་རེ་རེའི་སྟེང་ལ་གཏག་བཞིན་ཀློག་ཁྲིད་ཀྱི་དབུ་བརྩམས་བྱུང་། ང་ཚོས་ཀྱང་དམིགས་པ་རྩེ་གཅིག་ཏུ་གཏད་ཅིང་རིག་པ་རྣོ་སྐུད་ལྟར་བསྒྲིམས་ཏེ་སྒྲ་གདངས་མཐོ་ལ། འགྱུར་ཁུགས་ལྡན་པ། སྐད་ངག་ཡོད་ཚད་ཁོང་ནས་ཕྱུང་སྟེ་གསལ་བྱེད་ཡི་གེ་རེ་རེའི་གདངས་མཚམས་དང་ཆབས་ཅིག་མགོ་བོ་ནང་ཕྱོགས་སུ་ལྡེམ་ཙམ་ལྡེམ་ཙམ་འགུལ་ཏེ་ཀློག་འདོན་བྱས་པ་ན། དེ་ནི་བྱ་ཕོས་མཆུ་གཙག་གིས་རྒུམ་བུ་འཐུ་བ་དང་འདྲ་བར་ཉམས་འགྲོས་ལེགས་ལ། དབྱངས་གཅིག་གདངས་གཅིག་གི་ཀློག་འདོན་སྒྲ་དབྱངས་དག་མོ་དེ་སློབ་ཁང་གྲུ་བཞིའི་ནང་དུ་མ་ཤོང་བར་ཕྱི་རོལ་སློབ་གྲྭའི་ར་སྐོར་ཡོངས་སུའང་བྲག་ཅ་མཆེད།
        དེའི་དུས་སློབ་སྒྲུབ་ཀྱི་ཆ་རྐྱེན་ཞན་པས་ད་ཆའི་སློབ་བུ་ཚོ་ནང་བཞིན་ཡིག་འབྲུ་རེ་རེའི་དབུ་དང་རྐང་པ། ལག་པ་དང་དཔུང་བ། སོག་པ་དང་ཐུ་བ་སོགས་བྱེ་བྲག་སྨྱུག་རིམ་ཁྲིད་སྟོན་དང་། ལྷག་པར་གསལ་བྱེད་ཡི་གེ་རེ་རེའི་ནང་དོན་དང་མཐུན་པའི་སྣུམ་ཚོན་རི་མོ་སྨྱན་གཟུགས་ཀྱི་ལམ་ནས་སྟོན་པའི་བྱེད་ཐབས་ལེགས་པོ་ཞིག་རྩ་བ་ནས་མེད་པར་མ་ཟད། མི་སྒེར་གྱི་འདོན་སྟངས་ཚུལ་ལྡན་ཡིན་མིན་ལ་དག་ཐེར་བྱེད་པའི་ཞིབ་ཆ་ཞིག་དེ་བས་ཀྱང་ཁྱོན་ནས་བྲལ། སློབ་ཐུན་ཧྲིལ་པོར་དགེ་རྒན་གྱིས་འདོན་སྟངས་ཁོ་ན་ཁྲིད་པ་སྟེ། དང་ཐོག་རྒན་ལགས་ཀྱིས་ཁྲིད། ང་ཚོས་དེར་བསྟུན་ནས་བཏོན། དེའི་རྗེས་སུ་ངེད་ཅག་སློབ་མ་ཚོས་མཉམ་དུ་སྐད་གདངས་མཐོ་རུ་ཕྱུང་ཞིང་མཇིང་རྩ་འབུར་ཏེ་མིད་ཐག་ཕྱིར་སློག་ལ་ཁད་བར་དུ་ཡང་ནས་ཡང་དུ་བསྐྱར་ཟློས་སྒོས་ཀློག་འདོན་བྱས། དེ་ལྟར་ཉིན་གཅིག་གཉིས་ཙམ་འགོར་རྗེས་སློབ་མ་ཡོད་དོ་ཅོག་གིས་གསལ་བྱེད་ཀྱི་ཡི་གེ་རེ་རེ་གོ་རིམ་བཞིན་རྒན་ལགས་ཀྱིས་ཁྲིད་དབྱུག་གིས་བསྟན་པའི་ཚེ་ན་མ་འཁྲུལ་མ་འཛོལ་བར་ལྷང་ལྷང་དུ་འདོན་ཤེས་མོད། ཁྲིད་དབྱུག་གིས་གསལ་བྱེད་སུམ་ཅུའི་སྡེ་བའི་གོ་རིམ་ལྡོག་པའམ་གོ་རིམ་གཅོལ་ཏེ་ཡི་གེ་གང་རུང་ཞིག་ལ་མཛུབ་མོས་བཙུགས་པའི་ཚེ་ན་ཡོད་ཚད་འཇམ་ཐིང་ངེར། ཁུ་སིམ་མེར་བུད་འགྲོ་བ་རེད། དེ་ལྟར་དུས་ཚོད་ཀྱི་འཁོར་འགྲོས་དང་ལྷན་ཅིག་མག་མོག་ནས་གསལ་པོ། དཀའ་མོ་ནས་སླ་མོའི་རིམ་པ་ལྟར་རིམ་བཞིན་གསལ་བྱེད་སུམ་ཅུ་མགོ་རྔ་ཇི་ལྟར་དཀྲུགས་ན་ཡང་ལྷང་ལྷང་འཁྲུལ་མེད་དུ་ཀློག་འདོན་བྱེད་ཤེས་པའི་ཚད་དུ་ཐོན། ཀློག་འདོན་ལ་བྱང་རྗེས་ང་ཚོར་རྒན་ལགས་ཀྱིས་དཔོད་འབྲི་བྱེད་པའི་གོམ་ཁ་ད་གཟོད་སྒྱུར་མགོ་བརྩམས་པ་ཡིན།
        གསལ་བྱེད་སུམ་ཅུའི་དཔོད་འབྲིའི་གོམ་ཁ་ཡང་ད་ལྟའི་སློབ་བུ་ཚོ་ནང་བཞིན་ཕྱི་གསལ་ནང་གསལ་གྱི་སློབ་ཁང་གྲུ་བཞི་ལས་འབྲི་དེབ་སྟེང་དུ་འབྲི་སྦྱོང་བྱེད་པའམ་དེང་རབས་སློབ་ཆས་སྣ་ཚོགས་སྤྱད་དེ་འབྲི་སྦྱོང་བྱེད་པའི་ལས་སྐལ་བཟང་པོ་མ་ལྡན་ཡང་། དེའི་དུས་སློབ་ཆུང་སྐབས་ཀྱི་གསལ་བྱེད་ཡི་གེའི་འབྲི་སྦྱོང་བྱེད་སྟངས་ནི་གླེང་རིན་ཡོད་ཅིང་བརྗེད་མེད་དྲན་ཤིང་དུ་གྱུར་ཡོད་དེ། གསལ་བྱེད་སུམ་ཅུ་ཀློག་འདོན་ལ་བྱང་ཆུབ་རྗེས་དགེ་རྒན་གྱིས་ལས་ཀ་དང་པོ་ཀ་སྡེའི་ཡི་གེ་བཞི་པོ་ཁོ་ན་འབྲི་ཤེས་པའི་ཆེད་དུ་ང་ཚོ་སློབ་བུ་དག་སློབ་ཁང་གི་སྒོར་བསྐྲད་དེ་སློབ་གྲྭའི་ར་སྐོར་དུ་རྡོ་ཟེགས་དང་ས་རྡུལ་གྱིས་མནན་པའི་ཐང་དུ་དཔོད་འབྲི་བྱེད་དགོས་པའི་བཀའ་བསྒོས་པ་རེད། དེའི་མུར་བྱིས་པ་གྲིམ་པོ་ཅན་དང་གཟུགས་པོ་རིང་པོ་ཅན་དག་གིས་ལག་གང་སྔ་བརྩད་དེ་སློབ་གྲྭའི་ར་སྐོར་གྱི་ས་འཇམ་ས་དང་བདེ་ས་བདམས་ཟིན་ལ། དེའི་རྗེས་རྐང་མགྱོགས་ལག་མགྱོགས་ཀྱི་སློབ་བུ་ཚོས་ཀྱང་ས་འཁོབས་ཆེ་ས་དང་ས་ཡག་སར་དམིགས་ཏེ་རྐང་པས་ས་རྟགས་རྒྱག་པའམ་རྡེའུ་ནག་ཅིག་གིས་རྟགས་ཆེན་པོ་རྒྱག་སྲིད། ཤུལ་དུ་ལྷག་པའི་ཅོལ་ཆུང་དང་ན་སོ་ཆུང་བའི་སློབ་བུ་རེ་འགས་འབའ་འབུར་དང་རྡོ་ཟེགས་འདྲེས་མའི་གནས་བདམས་ཏེ་གསལ་བྱེད་ཡི་གེ་འབྲི་མགོ་མི་རྩོམ་ག་མེད་ཡིན། དེ་ལྟར་ཀ་ཁ་ག་ངའི་ཡིག་འབྲུ་བཞི་པོ་ངག་ནས་སྐྱོར་ཞོར་ཐང་དུ་འབྲི་བའི་མགོ་བརྩམས་མ་ཐག སློབ་གྲོགས་ཕན་ཚུན་གྱིས་སུས་བྲིས་པ་མགྱོགས་པ་དང་སུས་ས་རྒྱ་གཅོད་ཐུབ་མིན་ལ་འགྲན་རྩོད་ཀྱི་མགོ་ཡང་རྩོམ་པ་རེད། སློབ་བུ་ལ་ལས་ཀ་ཁ་ག་ངའི་ཡིག་གཟུགས་ཀྱི་བྲིས་ལེགས་མིན་ལ་མི་ལྟ་བར། སློབ་གྲྭའི་ར་སྐོར་ནས་མགོ་བཟུང་སྟེ་སློབ་གྲྭའི་སྒོ་ཆེན་ཁར་སུ་ཐོན་མིན་ལ་འགྲན་པ་དང་། ཡང་སློབ་གྲོགས་ལ་ལས་ཁང་པ་གྱན་གསུམ་དུ་གྲུབ་པའི་ཁང་ཤར་གྱི་མཐའ་བསྐོར་ཏེ་གང་མགྱོགས་འགྲན་པ་རེད། འོན་ཀྱང་སློབ་བུ་ནན་མོ་དང་ཞིབ་ཚགས་ཅན་གྱིས་ཡི་གེ་བཞི་པོ་བྲིས་པ་མགྱོགས་མིན་ལ་མི་ལྟ་བར་ལག་ཏུ་རྡེའུ་ཆུང་ཆུང་ཞིག་བསྣམས་ཏེ་ལྷོད་ཤ་ལྡན་པའི་ངང་ཀ་ཁའི་རྐང་ལག་དལ་གྱིས་བསྐོར་ཏེ་བྲིས་ལེགས་པོ་ལ་བརྩོན་པ་རེད། དུས་ཚོད་ཐུང་ངུ་ཞིག་གི་རིང་དུ་སློབ་བུ་ཆུང་ཆུང་རྣམས་ནི་ས་ལས་སྐྱེས་པ་དང་འདྲ་བར་ལྷན་པ་བརྒྱབ་པའི་དོར་མ་དང་རས་ལྷམ་ཡོངས་ས་རྡུལ་གྱིས་ཡོངས་སུ་གཡོགས་འདུག་པར་མ་ཟད། ངོ་གདོང་ཧྲིལ་པོར་ས་རྡུལ་གྱིས་གོས་ཤིང་སྣ་ཁུང་ལས་འཛགས་པའི་སེར་ཞིང་སྦོམ་པའི་སྣབས་ཀྱང་ས་རྡུལ་གྱིས་ཁ་དོག་བརྗེས་འདུག ཡིན་ཡང་ཁོ་ཚོས་རླུང་ནག་འཚུབ་མ་ལས་མགྱོགས་པའི་ཐང་ལ་བྲིས་པའི་གསལ་བྱེད་ཡི་གེ་ལ་ཕྱི་མིག་ཡང་ཡང་ལྟ་ཞོར་གདོང་གི་པད་མར་འཛུམ་པའི་འདབ་བརྒྱ་གྲོལ་ཞིང་སུས་ཡིག་འབྲུ་བཞི་པོ་རྒྱང་རིང་པོ་ལ་བྲིས་མིན་ཐད་གཤིབ་བསྡུར་བྱེད་བཞིན་ཨང་རིམ་གྱི་རྟིང་ཐག་གཅོད་པར་བྱེད། ངེད་ཅག་ས་རྡུལ་ཚི་དྲེག་དང་དགའ་དགོད་འུར་ཟིང་དང་མཉམ་དུ་གསལ་བྱེད་ཡི་གེ་རེ་རེ་ཐང་ལ་དཔོད་འབྲི་བྱས་ཏེ།སློབ་ཆུང་ལོ་རིམ་དང་པོ་ནས་ལམ་ལ་ཆས་ཤིང་ཀ་ཁའི་རྒྱང་འབོད་དང་ལྷན་ཅིག་ཕུགས་བསམ་གྱི་ཐེམ་སྐས་སུ་འགོམ་བཞིན་དམིགས་པ་རྒྱང་རིང་ལ་ཕྱོགས་ཏེ་མཆོང་ལྡིང་རྩེད་མཚར་གྱི་ཀློང་ནས་མདུན་ལྗོངས་ཡངས་པོར་གོམ་ཆུང་བརྟོལ་ཏེ་མུ་ནས་མུ་རུ་ཆས་པ་ཡིན་ནོ། །

39.7K

ཐག་རག་ཡིག་བསྒྱུར་མ་ལག

དྲ་ཚིགས་འདིའི་པར་དབང་གངས་ལྗོངས་ཉི་གཞོན་དྲ་བར་དབང་བས་ཕན་ཚུན་ལ་དབང་བཅོལ་མ་བྱས་གོང་རང་དགར་མི་སྤྱོད་པར་མཁྱེན།
དྲ་ཚིགས་དཔང་རྟགས།蜀ICP备14009601号-1